So ein Theater

miaut der Kater.

Des Modell isch scho toll,

I wois bloß net was des soll?

D´r Chef der hat heut betoniert,

na han´en au glei schee hofiert.

Doch komisch war die Reaktion

und dreckige Pfota des war mei Lohn?!

Da kommt mei Freund der "blede" Hund

und bellt der isch fei ganz schee rund.

Na klar und hoize duat der au no gsund !!

Mei Weg zur Kuche wird immer enger

was gibt au des da für ´en Denger ?

Leutla,Leutla i han was gsea,

aus altem Eisa und echt schea.

Oipackt in dia alte Stoi,

mei Idee war´s ned- ha noi.

D´r FeuerWerk´er und sei Frau

dia hen´s erfunda, s´isch echt a Schau!

Am Herd da hängt a Kachel dra,

jetzt fängt der in d´r Stuba a.

Z´erscht a Gstell aus Stahl na´gschraubt,

dann viele Schamottestoi drangebaut.

Wenn´s Abgas wandert durch den Block,

bleib I dahoim und wärm me dort.

Des Feuer, des isch abgebrannt - dafür strahlt jetzt die Speicherwand !

Ganz kuschlig warm so mog I des

dia Optik bloß ,dia macht me no nervös.

Doch so wia I mein FeuerWerk´er kenn

hod der scho wieder a paar Idea im Hira dren.

Die Bank isch droa

die Kachla au

Isch der ofa net a Schau ?

Wenn´s Wasser kocht, d´r Kessel pfeifft

na isch d´r FeuerWerk`er nemme weit.

Der schenkt sich jetzt a Tee´le ein

duat mir was in mei Näpfle rein.

Jetzt isch´s echt gmiatlich bei os Daheim.